རྩོམ་རྩལ།


བོད་ཀྱི་སྐད་ཡིག་གི་གལ་གནད།


སྤེན་པ་རྡོ་རྗེ། འཛིན་གྲྭ་བཅུ་པ་གསེར་ཉ།



སྔར་བྷོ་ཏའི་ལྗོངས་ཀྱི་རྒྱལ་པོ་སོ་གསུམ་པ་སྲོང་བཙན་སྒམ་པོའི་དུས་སུ་བོད་སྤྱི་ལ་དབང་བའི་ཡི་གེ་ཞིག་མཐོང་ཆོས་སུ་མེད་པར་དགོངས་ནས། ཁོང་གི་བློན་པོ་ཐུ་མི་སམ་བྷོ་ཊ་རྒྱ་གར་ཚ་བའི་ཡུལ་དུ་བཏང་གནང་མཛད་དེ། མཐར་བོད་སྤྱི་ལ་དགོས་མཁོ་ཆེ་བའི་བོད་ཀྱི་སྐད་ཡིག་བསྐྲུན་པར་བྱས་ཡོད། སྐབས་དེ་དུས་ནས་རྗེ་སྲོང་བཙན་གྱིས་བོད་ལ་མཁོ་བའི་སྐད་ཡིག་དེ་ངེས་རྒྱ་ཁྱབ་ཏུ་གཏང་སླད་རང་ངོས་ནས་་ཐོས་བསམ་གནང་བ་མ་ཟད། དེའི་ཐོག་སློབ་གཉེར་གྱི་རིམ་པ་ཡང་གསར་པ་བཙུགས།

ཁ་རྒྱུན་ལྟར་མི་རིགས་ཤིག་ལེགས་པར་གནས་པར་ངེས་པར་སྐད་ཡིག་ཞིག་ངེས་པར་དགོས་གལ་ཆེ་བ་ཡིན་ཞེས། སའི་སྟེང་རི་མོ་འབྲི་བ་ལྟར་མ་ཡིན་པར་དངོས་ཡོད་ཀྱི་ལོ་རྒྱུས་ནང་གསལ། རྒྱལ་ཁབ་ཞིག་ཡུན་རིང་འཚོ་བར་བྱས་པ་ལ་ཟས་གོས་གཅིག་པུ་ཙམ་མ་ཡིན་པར་སྐད་ཡིག་དགོས་རྒྱུ་ཧ་ཅང་གལ་ཆེ། སྐད་ཡིག་གི་གཞི་རྩ་ཡག་པོ་ཞིག་ཡོད་ན་མི་རིགས་དེ་རྩ་ཡལ་དུ་འགྲོ་རྒྱུ་མེད་ལ། མ་འོངས་པར་དཀའ་ངལ་གྱི་རིགས་འཕྲད་ཀྱང་ཇི་སྲིད་སྐད་ཡིག་ཡོད་ཚེ་མི་རིགས་དེ་འཚོ་ཐུབ་པ་ཡིན།

དེང་སང་འཛམ་གླིང་སྤྱི་ལ་དབྱིན་ཡིག་ཁྱབ་ཆེན་པོ་ཞིག་ཡོད་ནའང་། དབྱིན་ཡིག་རྐྱང་པ་ཤེས་པ་ཙམ་གྱི་མི་འགྲིག་པར་རང་གི་རྒྱལ་ཁབ་ཀྱི་མཐོང་རྒྱུ་ཡོད་པའི་སྐད་ཡིག་ཇི་མ་ཇི་བཞིན་ཤེས་རྒྱུ་དེ་བས་གལ་ཆེ། དེའི་ཐོག་མཁས་པ་མང་པོས་བཀའ་སློབ་ཕེབས་ཟིན་ལ། བོད་ཀྱི་མཁས་པ་ཆེན་པོ་མང་པོས་ཡང་དངོས་ཡོད་ཀྱི་བཀའ་སློབ་ཕེབས་ཡོད། བོད་ཀྱི་མཁས་པ་རྗེ་གུང་ཐང་པས་གསུང་ལས།



        ཀུན་དང་མཐུན་པ་རྩ་བ་ཡིན་མོད་ཀྱང་།།            ཐམས་ཅད་ལད་མོ་བྱས་ན་ཀླད་མེད་ཡིན།།         

        སྐད་རིགས་ཐམས་ཅད་ཤེས་ན་བཟང་མོད་ཀྱང་།།   རང་གི་ཕ་སྐད་བརྗེད་ན་ངོ་ཚ་ཡིན།།



ཞེས་གསུངས་པ་བཞིན་སྐད་ཡིག་ཐམས་ཅད་ཤེས་ན་བཟང་པོ་ཡིན་ནའང་། རང་གི་ཕ་སྐད་དེ་རླུང་ཁྲོད་ཀྱི་མར་མེ་ལྟར་ཡལ་འགྲོ་བ་ན་ངོ་ཚ་ཡིན་པ་ཤེས་དགོས།  དེང་དུས་རབས་ཉིར་གཅིག་པའི་ནང་དབྱིན་ཡིག་ཤེས་རྒྱུ་དེ་གལ་གནད་ཆེ་བ་ཞིག་དང་མི་སུ་འདྲ་ཞིག་ཡིན་རུང་ཕན་ཚུན་གོ་བརྡ་སྤྲོད་བར་དབྱིན་ཡིག་དགོས་ངེས་ཡིན་ཡང་། རྩམ་གཟན་བོད་མི་ཞིག་ཡིན་པའི་ཆ་ནས་བོད་ཀྱི་སྐད་ཡིག་མ་ཤེས་ན་མི་འགྲིག་པ་དང་། ཤེས་དགོས་པ་ནི་མེད་དུ་མི་རུང་བ་ཞིག་ཡིན། བོད་ཀྱི་སྐད་ཡིག་ནི་ནང་ཆོས་དང་འབྲེལ་མ་བ་གཏིང་ཟབ་ཡོད་ལ། ལོ་བརྒྱ་ཕྲག་མང་པོའི་སྔར་བོད་ཀྱི་ལོ་རྒྱུས་མཐོང་ཆོས་སུ་ཡོད།  དེར་བརྟེན་བོད་མི་ཚོས་ནང་ཆོས་སློབ་སྦྱོང་བྱ་རྒྱུ་དང་། ད་ལྟའི་བཙན་བྱོལ་གྱི་གནས་བབ་ལ་བལྟས་ཚེ་ང་ཚོས་རང་གི་སྐད་ཡིག་ཁོག་པའི་སྙིང་ལྟར་སྲུང་སྐྱོབ་བྱ་དགོས་རྒྱུ་ནི་གལ་ཆེན་པོ་ཆགས་ཡོད། དེ་ཙམ་མིན་པར་མ་འོངས་བོད་དེ་ལེགས་པར་གནས་པ་ལ་ད་ལྟ་ནས་བོད་ཀྱི་སྐད་ཡིག་ཐོག་དོ་སྣང་དང་། རྒྱ་ནག་ལས་ཐ་དད་དུ་ཡིན་པའི་རྒྱུ་མཚན་ཡག་ཤོས་ཅིག་ནི་རང་གི་རྒྱལ་ཁབ་ལ་རང་གི་སྐད་དང་ཡི་གེ་ཡོད་པ་དེ་ཡིན། དེར་བརྟེན་ངས་དུས་རྟག་ཏུ་སོ་སོའི་བོད་ཀྱི་སྐད་ཡིག་དེ་སྲུང་སྐྱོབ་བྱེད་དགོས་པ་གལ་ཆེན་པོ་མཐོང་གི་ཡོད།






འབྲི་ཀློག་གི་ཤེས་ཡོན་ལས་མིའི་ཀུན་སྤྱོད་སྤྱོད་གལ་ཆེ།



ལྷག་པ་སྒྲོལ་མ།    དགུ་པ་བུམ་པ།



ཐོག་མར་འགྲོ་བ་མི་ཚང་མ་གཅིག་འགྱུར་གྱི་འདུ་ཤེས་ཡོད་པ་ནི་ཚང་མ་བདེ་བ་འདོད་པ་དང་སྡུག་བསྔལ་མི་འདོད་པ་གཅིག་མཚུངས་་ཡིན། ཡིན་ནའང་དེང་སང་འཛམ་བུ་གླིང་དེའི་ནང་སྡུག་བསྔལ་མང་པོ་ཞིག་ཡོང་བསྡད་པ་དང་། འགྲོ་བ་མི་དང་མིའི་བར་བསམ་ཤེས་མེད་པའི་རྐྱེན་གྱིས་ཕན་ཚུན་མ་སྐྱིད་པའི་ཚོར་བ་མང་པོ་ཞིག་ཡོང་བ་ནི་གཙོ་བོ་བཟང་སྤྱོད་མ་མདང་བ་ལ་བརྟེན་ནས་བྱུང་། དེ་ཡང་བཟང་སྤྱོད་ཞེས་པ་ནི་རྒྱུན་དུ་སེམས་ཅན་གཞན་དང་འགྲོ་བ་ཀུན་ལ་ཕན་པ་བསྒྲུབ་རྒྱུ་དང་གཞན་སེམས་ཤེས་ཚོར་ཐུབ་པ། ཆོག་ཤེས་དང་ནང་གི་ཡོན་ཏན་། དེ་ཙམ་དུ་མ་ཟད་རྒྱུན་དུ་སེམས་ཅན་གཞན་ལའང་བསམ་ཤེས་ཐུབ་མཁན་གྱི་གང་ཟག་རྣམ་སྤྱོད་ཅན་ཞིག་ལ་ཟེར།

དེ་སྔོན་ང་ཚོར་བོད་མི་རྣམས་ནི་རྒྱུན་དུ་སེམས་པར་བདེ་བར་གནས་པ་དང་ཕན་སེམས་ལ་རྗེས་སུ་ཡི་རངས། ཆོག་ཤེས་དང་ནང་གི་ཡོན་ཏན་ཙམ་དུ་མ་ཟད་རྒྱུན་དུ་བྱམས་པ་དང་བརྩེ་བ་ཁོ་ན་ཡོད་པས་མཛུམ་མདངས་ཀྱི་ཞལ་རས་གད་མོ་ཚེག་ཚེག་བཏོན་པ་ནི་ཏན་ཏན་་བཟང་སྤྱོད་ཀྱི་ནུས་པ་ལས་ཡིན། བྱས་ཙང་མི་གཅིག་གྱི་མི་ཚེའི་འཚོ་བའི་འཕྲོད་བལྟས་པ་ཡིན་ནས་འབྲི་ཀློག་གཉིས་ཀྱིཤེས་ཡོན་ལས་ཀྱང་བཟང་སྤྱོད་གལ་ཆེ།

དོན་ཚན་གཉིས་པ། བཟང་སྤྱོད་ལྡན་མཁན་གྱི་སྐྱེ་བོ་ཞིག་ལ་མཚོན་ན་ས་ཕྱོགས་གང་དུ་ནང་གནས་པ་དང་། སྤྱི་ཚོགས་གང་དུ་བསྐྱོད་པ་ཡིན་ནའང་། མི་ཚང་མའི་དགའ་མོས་བྱེད་ས་དང་ཡིད་ཆེས་བྱེད་སའི་སྐྱེ་བོ་དམ་པ་ཞིག་ཏུ་གྱུར།དེ་ལས་ལྡོག་ཏེ་དེ་སང་དུས་རབ་ཉེར་གཅིག་པའི་ནང་ཡོང་དང་ཡོང་པ། འགྲོ་དང་འགྲོ་བཞིན་པའི་སྤྱི་ཚོགས་ལྷིང་འཇགས་མེད་པ་བཟོ་མཁན་ཞི་བདེ་རྩ་བརླག་གཏོང་མཁན་གྱི་འཇིགས་སྐུལ་རིང་ལུགས་པ་ཚོས་སྙིང་རྗེ་སྤུ་ཙམ་མེད་པར་འཛམ་བུ་གླིང་དེའི་ནང་མི་སྟོང་ཕྲག་མང་པོ་རྩ་་མེད་བཏང་པ་དང་་། སྤྱི་ཚོགས་རྡབ་གསིག་བཟོས་པ་དེས་ག་རེ་མ་འདངས་བའི་རྐྱེན་རེད་ཟེར་ན། ཁོང་ཚོའི་རྒྱུད་ལ་བཟང་སྤྱོང་མ་འདང་བ་རེད་མ་གཏོགས་ཁོང་ཚོར་དེ་དུས་ཀྱི་ཤེས་ཡོན་འབྲི་ཀློག་མ་འདངས་བས་རེད་བསམ་པ་གཏན་ནས་མེད།སོང་ཙང་དེང་དུས་ཀྱི་ཤེས་ཡོན་འབྲི་ཀློག་ཐོག་མཁས་པ་ག་ཚོད་ཡིན་ནས་བཟང་སྤྱོད་མེད་ན་རྐྱོན་ཆེན་པོ་ཡིན།

དོན་ཚན་གསུམ་པ།  དེང་སང་ཚན་རིག་པ་སྙན་གྲགས་ཅན་རྣམས་ཀྱིས་མིའི་སེམས་ཁམས་ལ་བརྟག་དཔྱད་བྱེད་པའི་གྲུབ་འབྲས་དང་། དེ་བཞིན་རྒྱལ་སྤྱིའི་ཤེས་་ཡོན་ཅན་རྣམ་པ། ལྷག་པར་རུ་༸སྤྱི་ནོར་གོང་ས་སྐྱབས་མགོན་ཆེན་པོ་མཆོག་ནས།དེང་དུས་ཀྱི་ཤེས་ཡིན་སློབ་སྦྱོང་བྱེད་སྟངས་དེར་འདོད་བློ་ཁེང་གི་མེད་པ་དང་། དེང་གི་ཤེས་ཡོན་རྣམ་པའི་ནང་བཟང་སྤྱོད་གལ་ཆེན་དུ་བརྩིས་ནས། དེང་སང་སློབ་གྲྭ་ཁག་ལ་སློབ་ཚན་གསར་པ་ཞིག་གཏན་འབེབས་བྱེད་ཡོད་པ་ནི་ཆོས་དང་མ་འབྲེལ་བའི་བཟངསྤྱོད་སྐོར་ཡིན་པ་ནི་རྒྱུ་མཚན་དེ་ལ་ཐུག་ཡོད།དེ་ཡང་ཁོང་རྣམ་པའི་དམིགས་ཡུལ་གཙོ་བོ་ནི།མིགཅིག་གི་མི་ཚེའི་ནང་འབྲི་ཀློག་གི་ཤེས་ཡོན་ཡོད་པ་ཙམ་གྱི་མི་ཆོག་པར་བཟང་སྤྱོད་ནི་དེ་ལས་ཀྱང་གལ་ཆེ་བ་བརྩི་བཞིན་ཡོད་པས་ཡིན།བྱས་ཙང་བཟང་སྤྱོད་ནི་མེད་ཐབས་མེད་པས་ངེས་པར་དུ་ང་ཚོའི་གཤིས་རྒྱུད་ནང་དགོས་པ་ཡིན།